آئیں سب ملکر ایک ایسے پاکستان کیلئے جدوجہد کریں جو مذہبی ،نسلی،اور سیاسی تفریق سے پاک ہو۔ صدر اور وزیر اعظم کا یوم پاکستان پر پیغام
اسلام آباد ( پاکستانی نیوز) صدر آصف علی زرداری نے اپنے پیغام میں کہا ہے کہ آزادی سے لے کر اب تک کے سفر میں ہم نے مختلف شعبوں میں نمایاں کامیابیاں حاصل کیں، افواج، سول انتظامیہ اور قانون نافذ کرنے والے اداروں نے غیر متزلزل عزم کے ساتھ سلامتی اور خودمختاری کو یقینی بنایا، دہشت گردی کیخلاف دو دہائیوں پر محیط جنگ میں ان کا فاتحانہ کردار رہا۔
صدر نے مزید کہا ہے کہ آج اپنے کشمیری بھائیوں کی آزادی کیلئے بے مثال قربانیوں کو بھی تسلیم کرتے ہیں، پاکستان کو اسرائیلی فورسز کی جانب سے معصوم فلسطینیوں کے اندھا دھند قتل، تعلیمی اداروں اور ہسپتالوں پر مسلسل حملوں پر گہری تشویش ہے، پاکستان 1967ء سے قبل کی سرحد کے مطابق القدس شریف میں دارالحکومت پر مبنی ایک آزاداور پائیدار ریاست کا حامی ہے۔
وزیر اعظم شہباز شریف نے اپنے پیغام میں کہا کہ عوام نے 8 فروری کے انتخابات میں اپنے نمائندوں کو منتخب کیا، مہنگائی، بیروزگاری، گردشی قرضے، مالیاتی اور تجارتی خسارے سے آگاہ ہیں، مربوط پالیسی اصلاحات کے ذریعے ملکی معاشی بحالی اور خوشحالی کیلئے پرعزم ہیں، غیر معمولی حالات کا مقابلہ کرتے ہوئے ثابت قدمی کا مظاہرہ کرنا اور وقت کی کسوٹی پر پورا اترنا ہے۔
