پاکستان ایس سی او کی میزبانی کیلئے تیار
پاکستان شنگھائی تعاون تنظیم کے رکن ممالک کے سربراہان حکومت کی کونسل کے 23 ویں اجلاس کی میزبانی کرے گا۔
دفتر خارجہ کی ترجمان کے مطابق وزیراعظم شہبازشریف شنگھائی تعاون تنظیم کے رکن ممالک کے سربراہان حکومت کے اجلاس کی صدارت کریںگے۔
شنگھائی تعاون تنظیم کے رکن ممالک چین، روس، بیلاروس، قازقستان، کرغزستان، تاجکستان اور ازبکستان کے وزرائے اعظم کے علاوہ ایران کے پہلے نائب صدر اور ہندوستان کے وزیر خارجہ اپنے ممالک کی نمائندگی کریں گے۔
منگولیا کے وزیراعظم، مبصر ریاست اور ترکمانستان کے وزراء کی کابینہ کے نائب چیئرمین اور وزرائے خارجہ اور خصوصی مہمان اس اجلاس میں شرکت کریں گے۔
وزیراعظم اجلاس کے موقع پر دورے پر آئے ہوئے وفود کے سربراہان سے اہم دوطرفہ ملاقاتیں بھی کریںگے۔
شنگھائی تعاون تنظیم کونسل کے رکن ممالک کے سربراہان حکومت کے اجلاس میں معیشت، ماحولیات، سماجی و ثقافتی روابط کے شعبوں میں تعاون پر بات چیت کی جائے گی اور تنظیم کی کارکردگی کا جائزہ لیا جائے گا۔
