پاکستان نے آٹھویں بار سلامتی کونسل میں غیر مستقل رکن کے طور پر نشست سنبھال لی
نیویارک اقوام متحدہ ( ذیشان شمسی ) پاکستان نے آٹھویں مرتبہ سلامتی کونسل کی غیر مستقل رکنیت سنبھال لی ہے جسکے بعد پاکستان کا قومی پرچم جمعرات کو اقوام متحدہ کی سلامتی کونسل کے چیمبر کے سامنے نصب کیا گیا، شمولیتی تقریب کے حصے کے طور پر، پانچ نئے آنے والے غیر مستقل ارکان – پاکستان، ڈنمارک، یونان، پانامہ اور صومالیہ – کے پرچم اقوام متحدہ کے ہیڈکوارٹرز میں سلامتی کونسل کے اسٹیک آؤٹ پر نصب کیے گئے۔ نئے ارکان نے جاپان، ایکواڈور، مالٹا، موزمبیق اور سوئٹزرلینڈ کی جگہ لی جن کی مدت 31 دسمبر 2024 کو ختم ہو گئی تھی۔ پاکستان کے متبادل مستقل مندوب، سفیر عاصم افتخار احمد نے قومی پرچم نصب کیا جو ایک شاندار تقریب کا حصہ تھا۔ اپنے مختصر خطاب میں، انہوں نے کہا کہ پاکستان اقوام متحدہ کے منشور کے مقاصد اور اصولوں کی روشنی میں رہنمائی حاصل کرتا رہے گا، جن میں بین الاقوامی امن و سلامتی کا قیام اور مساوی حقوق اور خود ارادیت کے اصول پر مبنی اقوام کے درمیان دوستانہ تعلقات کو فروغ دیتا ہے۔ "پاکستان ہمیشہ مقبوضہ اور مظلوم اقوام اور ان کے حق خود ارادیت کے لیے ایک مضبوط آواز رہے گا،” سفیر عاصم افتخار "ہمیں پرانے اور نئے تنازعات کی بنیادی وجوہات کو سنجیدگی سے حل کرنا ہوگا، مکالمے اور سفارت کاری کو ترجیح دینا ہوگی، اور علاقائی و عالمی سطح پر اعتماد سازی کی حمایت کرنی ہوگی تاکہ کشیدگی کو کم کیا جا سکے، اسلحے کی دوڑ کو روکا جا سکے، اور امن، استحکام اور ترقی کے لیے سازگار ماحول پیدا کیا جا سکے،”تقریب کی صدارت کرنے والے قازقستان کے مستقل نمائندے، کریت عمرُوف نے اس اعتماد کا اظہار کیا کہ کونسل کے پانچ نئے ارکان عالمی امن و سلامتی کے مسائل پر زیادہ گہرائی اور توجہ دلائیں گے۔
