پاکستان،بنگلہ دیش کے6 مفاہمتی یادداشتوں پر دستخط

پاکستان اور بنگلہ دیش نے دو طرفہ تعلقات کو بڑھانے کے لیے مختلف شعبوں میں مفاہمت کی چھ یادداشتوں پر دستخط کیے ہیں۔
معاہدے پر دستخط کی تقریب آج ڈھاکہ میں منعقد ہوئی ،جس کی نگرانی نائب وزیراعظم محمد اسحاق ڈار اور بنگلہ دیش کے مشیر خارجہ توحید حسین نے کی۔
معاہدے میں سفارتی اور سرکاری پاسپورٹ ہولڈرز کے لیے ویزا کے خاتمے کا معاہدہ، تجارت کے لیے جوائنٹ ورکنگ گروپ کے حوالے سے یاداشت، فارن سروس اکیڈمیوں کے درمیان ایم او یو، ایسوسی ایٹڈ پریس آف پاکستان کارپوریشن اور بنگلہ دیش سنگباد سنگستھا کے درمیان ایم او یو، انسٹی ٹیوٹ آف اسٹریٹجک اسٹڈیز اسلام آباد اور بنگلہ دیش انسٹی ٹیوٹ آف انٹرنیشنل اینڈ اسٹریٹجک اسٹڈیزکے درمیان ایم او یواور کلچرل ایکسچینج پروگرام شامل ہیں ۔
یہ معاہدے تجارت اور اقتصادیات، سفارت کاروں کی تربیت، علمی تبادلوں، میڈیا تعاون اور ثقافتی تبادلوں میں دوطرفہ تعاون کو ادارہ جاتی اور مزید مضبوط کریں گے۔