وزیراعظم کی جاپانی سرمایہ کاروں کو ہر ممکن سہولیات فراہم کرنے کی یقین دہانی
وزیر اعظم محمد شہباز شریف نے جاپانی سرمایہ کاروں اور مالیاتی اداروں کو پاکستان میں تما م ممکنہ سہولتیں فراہم کرنے کی یقین دہانی کرائی ہے۔
انہوں نے یہ بات جاپان کے بین الاقوامی تعاون کے بینک کے کان کنی اور میٹل فائنانس کے شعبے کے ڈائریکٹر جنرل تارو کاٹو سے آج اسلام آباد میں ملاقات میں کہی۔
وزیراعظم نے کہا کہ پاکستان جاپان کے ساتھ سفارتی اور معاشی تعاون کو انتہائی قدر کی نگاہ سے دیکھتا ہے۔
شہباز شریف نے کہا کہ پاکستان زراعت، آئی ٹی، ٹیکسٹائل اور دیگر شعبوں میں جاپانی ٹیکنالوجی کی جدت اور پیشہ ورانہ مہارت سے خاطر خواہ استفادہ کر سکتا ہے۔
انہوں نے کہا کہ پاکستان کے بڑے معاشی اور ترقیاتی منصوبوں میں عالمی مالیاتی ادارے اورغیرملکی سرمایہ کار اپنی بھرپور دلچسپی اور تعاون کا اظہارکر رہے ہیں۔
انہوں نے پاکستان کو سرمایہ کاروں اور سرمایہ کاری کیلئے محفوظ ملک بنانے کے عزم کا اعادہ کیا۔
