آئی ایم ایف کیساتھ نئے معاہدے کیلئے بات چیت شروع کر دی،وزیر خزانہ

وفاقی وزیر خزانہ محمد اورنگزیب نے واشنگٹن میں اے ایف پی کو انٹرویو دیتے ہوئے کہا ہے کہ پاکستان نے اپنے اقتصادی اصلاحاتی پروگرام کی حمایت کے لیے آئی ایم ایف کے ساتھ اربوں ڈالر کے نئے قرض کے معاہدے پر بات چیت شروع کر دی ہے۔ انہوں نے کہا کہ بین الاقوامی مالیاتی فنڈ کے ساتھ 9 ماہ کے 3 بلین ڈالر کے قرض پروگرام کے تحت ایک ارب دس کروڑ ڈالر کی حتمی قسط رواں ماہ کے آخر میں منظور ہونے کا امکان ہے۔ وزیر خزانہ نے کہا کہ آئی ایم ایف کے ساتھ نئے قرض کیلئے ہم کم از کم تین سالہ پروگرام کے لیے درخواست کریں گے۔ انہوں نے کہا امریکہ ہمارا سب سے بڑا تجارتی پارٹنر ہے اور اس نے ہمیشہ سرمایہ کاری کے معاملے میں ہمیشہ ہماری مدد کی ہے۔انہوں نےکہا سرکاری اداروں کی نجکاری کے حوالے قومی ایئر لائن ہمارا پہلا منصوبہ ہے اور ہماری کوشش ہے کہ جون کے آخر تک اسے فنشنگ لائن پر لے جائیں۔انہوں نے کہا کہ آئندہ دو سال میں نجکاری کے عمل کو تیز کیا جائے گا۔