واشنگٹن،عدالت عظمیٰ کے جج کی سربراہی میں وفد کا دورہ امریکہ

واشنگٹن(ذیشان شمسی) عدالت عظمیٰ کے سینئر جج جسٹس شاہد وحید کی سربراہی میں اعلیٰ سطح وفد کی واشنگٹن میں پاکستانی سفارتخانے آمد،سفیر پاکستان رضوان سعید شیخ نے استقبال کیا۔
وفد میں لاہور، سندھ، پشاور اور اسلام آباد ہائی کورٹ کے معزز ججز صاحبان ، ضلعی عدلیہ کے جج اور ایڈیشنل اٹارنی جنرل شامل تھے۔
وفد دورہ امریکہ میں اپنے ہم منصبوں سے ملاقات کر رہا ہے تاکہ ملکی اور سرحد پار تنازعات کے تصفیے کے ماحول کو مضبوط ، معاہدوں کے نفاذ کو بہتر ، عدالتوں میں زیر التوا ء کیسز کی تعداد کو کم کرنے اور انصاف تک مؤثر رسائی کو یقینی بنانے کے لئے علم اور مہارت کا تبادلہ خیال کیا جا سکے۔
سفیر پاکستان رضوان سعید شیخ نے پاک امریکہ تعلقات میں بہتری کو اجاگر کیااور پاکستان ، امریکہ کے درمیان کثیر جہتی تعلقات کو مضبوط بنانے، بہتر خدمات اور انصاف کی فراہمی کے لئے استعداد کار میں اضافے کے لئے اعلی سطح کے تبادلوں کی اہمیت پر زور دیا۔

سفیر پاکستان نے اس طرح کے تبادلوں کو حکومتی سطح پر روابط و تعاون کی ایک بہترین مثال قرار دیتے ہوئے مختلف سطحوں پر ان تبادلوں میں اضافے کی اہمیت پر زور دیا تاکہ نظام انصاف کو بہتر بنانے اور قانونی اصلاحات کے حوالے سے مکمل طور پر استفادہ کیا جا سکے۔

جسٹس شاہد وحید نے اپنے ریمارکس میں کہا کہ یہ امید اور خواب کا سفر ہے۔ انہوں نے اس بات پر زور دیا کہ پاکستان کی قانونی برادری ملک میں ایک مؤثر نظام انصاف کو یقینی بنانے کیلئے پرعزم ہے۔

مسز مارٹینا پولسیک نے اپنے ریمارکس میں اس امید کا اظہار کیا کہ پاکستان کے سینئر ججز اور قانونی برادری کے اراکین کا دورہ دونوں ممالک کے درمیان قانون کے شعبے میں معلومات کے تبادلے اور مضبوط تعلقات کو فروغ دے گا۔

سفیر پاکستان رضوان سعید شیخ نے کامیاب اور نتیجہ خیز دورے کے حوالے سے نیک خواہشات کا اظہار کیا۔