شہید بی بی جرأت،استقامت اور امید کی علامت تھیں،بلاول بھٹو
پاکستان پیپلز پارٹی کے چیئرمین بلاول بھٹو زرداری نے کہا ہے کہ شہید محترمہ بینظیر بھٹو کی زندگی جراَت، استقامت اور لاکھوں پاکستانیوں کے لیے امید کی علامت تھی۔ اُ نکی جدوجہد اور زندگی قائد عوام شہید ذوالفقار علی بھٹو کے وژن سے گہرائی سے جڑی تھی۔ شہید محترمہ بینظیر بھٹو کے 17ویں یوم شہادت پر پیغام میں بلاول بھٹو زرداری نے کہا کہ وہ بی بی شہید کی بے مثال قربانیوں، غیر متزلزل قیادت اور پاکستان کے لیے ان کی پائیدار میراث کو خراج عقیدت پیش کرتے ہیں۔ ہم شہید محترمہ بینظیر بھٹوکے انسانی آزادی اور جمہوری اقدار کے فلسفے پر عمل پیرا ہیں۔ہم دہشت گردی، انتہا پسندی اور پاکستان کے استحکام کو خطرے میں ڈالنے والی کسی بھی قوت کے خلاف جدوجہد جاری رکھیں گے۔ شہید بھٹو کی طرح، شہید محترمہ بینظیر بھٹو بھی عوام کی طاقت پر یقین رکھتی تھیں۔ مساوات اور خوشحال پاکستان کے لیے اپنے والد کے وژن سے بی بی شہید کی غیر متزلزل وابستگی ہم سب کے لیے ایک تحریک ہے۔ شہید محترمہ بینظیر بھٹو بھی قائدِ عوام کی طرح مزدوروں، کسانوں اور پسماندہ طبقات کو قومی ترقی کی بنیاد سمجھتی تھیں۔ انہوں نے مصالحت، مشاورت اور مختلف نقطہ نظر کو سمجھنے کی فلسفیانہ سوچ سے ایک جدید اور روشن پاکستان کی بنیاد رکھی۔ بلاول بھٹو زرداری نے کہا کہ وہ شہید محترمہ بینظیر بھٹو کی میراث کو آگے بڑھانے کے لیے پرعزم ہیں، جنہوں نے ایسے پاکستان کا خواب دیکھا تھا جہاں ہر شہری کو برابری کے مواقع اور وسائل تک رسائی حاصل ہو۔شہید محترمہ بینظیر بھٹو اسلامی دنیا کی پہلی منتخب خاتون وزیراعظم تھیں، عالمی اشوز پر بھی ان کی لیگیسی مشعلِ راہ ہے۔فلسطین اور مسئلہ کشمیر سمیت تصفیہ طلب عالمی اشوز پر بی بی شہید کے ویژن سے رہنمائی لیتے رہیں گے۔ان کی مدبرانہ قیادت عالمی چیلنجوں سے نمٹنے اور مظلوم قوموں کے حقوق کے لیے آواز اٹھانے میں ایک رہنما اصول کے طور پر کام کرتی ہے۔بلاول بھٹو زرداری نے کہا کہ جمہوریت اور آئینی حکمرانی کو درپیش چیلنجوں پر قابو پانے کے لیے قوم متحد ہو جائے۔شہید محترمہ بینظیر بھٹو کی زندگی استقامت اور اپنی ذات کو بھول کر ایک عظیم مقصد کے لیے خود کو وقف کرنے کا سبق دیتی ہے۔بی بی شہیدکو خراج عقیدت پیش کرنے کا بہترین طریقہ یہ ہے کہ ان کے خواب کو حقیقت بنایا جائے۔بی بی شہید کا خواب ایک جمہوری، ترقی پسند اور جامع پاکستان ہے، جہاں ہر فرد کی عزت و تکریم کو یقینی بنایا جائے۔ بلاول بھٹو زرداری نے کارکنان اور قوم سے اپیل کی کہ وہ بی بی شہید کے جمہوریت، رواداری اور سماجی انصاف کے اصولوں کے ساتھ اپنی وابستگی کے عہد کی تجدید کریں۔وہ دن دور نہیں جب شہید محترمہ بینظیر بھٹو کے انصاف پر مبنی پاکستان کا وژن حقیقت بنے گا۔
