پاکستان کا زمین سے زمین تک مار کرنیوالے ابدالی میزائل نظام کا کامیاب تجربہ
پاکستان نے آج فوجی مشق انڈس کے دوران زمین سے زمین پر ساڑھے چار سو کلومیٹر کے فاصلے تک مار کرنے والے ابدالی ہتھیاروں کے نظام کا کامیاب تجربہ کیا ہے۔
اس تجربے کا مقصد فوج کی آپریشنل تیاریوں اور اہم تکنیکی اہداف کو یقینی بناتے ہوئے میزائل کے جدید نیوی گیشن سسٹم اور دیگر حربی صلاحیتوں میں اضافہ شامل ہیں۔
آرمی سٹریٹجک فورسز کمان کے کمانڈر، سٹریٹجک پلانز ڈویژن کے سینئر حکام، آرمی سٹریٹجک فورسز کمانڈ اور پاکستان کے سٹریٹجک اداروں کے سائنسدانوں اور انجینئرز نے بھی کامیاب تجربے کا مشاہدہ کیا۔
صدر، وزیراعظم، چیئرمین جائنٹ چیفس آف سٹاف کمیٹی اور تینوں مسلح افواج کے سربراہان نے اس کامیاب تجربے پر فوجیوں، سائنسدانوں اور انجینئرز کو مبارکباد دی ہے۔
انہوں نے کم از کم قابل اعتماد دفاعی صلاحیت کو یقینی بنانے اور کسی بھی جارحیت کے خلاف قومی سلامتی کے تحفظ کیلئے پاکستان کی مسلح افواج کی جنگی تیاریوں اور تکنیکی استعداد پر مکمل اعتماد کا اظہار کیا۔
