معیشت کی ڈیجیٹائزیشن حکومتی ترجیح ہے،وزیراعظم
وزیر اعظم شہباز شریف نے کہا ہے کہ حکومت معیشت کی ڈیجیٹایزیشن اور لین دین کے نظام کو کیش لیس اور ڈیجیٹل نظام پر لے جانے کے لئے ترجیحی بنیادوں پر کام کر رہی ہے ۔
اتوار کے روز اسلام آباد میں کیش لیس معیشت کے حوالے سے جائزہ اجلاس کی صدارت کرتے ہوئے انہوں نے ہدایت کی کہ راست کے نظام کو ضلعی حکومتوں کی سطح پر لے جانے کے حوالے سے تمام چیف سیکریٹریز وفاقی حکومت سے بھرپور تعاون کریں۔
وزیراعظم نے کیش لیس معیشت کیلئے اٹھائے گئے اقدامات اور پیشرفت پر اطمینان کا اظہار کیا۔
اجلاس کو بتایاگیا کہ پاکستان ڈیجیٹل پبلک انفراسٹرکچر کے ذریعے ڈیجیٹل آئی ڈیز بنائی جائیں گی جن میں ہر شخص کی قومی شناختی کارڈ ، بائیو میٹرک اور موبائل فون نمبرز کی معلومات ہوں گی انہی ڈیجیٹل آئی ڈیز کے ذریعے ڈیجیٹل ادائیگیاں کی جا سکیں گیں۔
اجلاس کو بتایاگیا کہ صوبائی حکومتوں نے پبلک ٹو گورنمنٹ اور گورنمنٹ ٹو پبلک ادائیگیوں کے نظام کو راست سے منسلک کرنے کے حوالے سے نمایاں پیشرفت دکھائی ہے۔
اجلاس کو بتایا گیا کہ ڈیجیٹل انفراسٹرکچر کی تعمیر کے حوالے سے وفاقی ترقیاتی اداروں نے فائبر کیبل بچھانے کیلئے جگہ فراہم کردی ہے جبکہ پاکستان ریلوے اور نیشنل ہائی وے اتھارٹی سے اس حوالے سے بات چیت جاری ہے ۔
