افغانستان اپنی سرزمین دہشت گردی کیلئے استعمال نہ ہونے دے،دفتر خارجہ
اسلام آباد(سعدعمر)پاکستان نے افغان حکام پر زور دیا ہے کہ اپنی سرزمین پاکستان کے خلاف دہشت گردوں کی سرگرمیوں کیلئے لانچنگ پیڈ کے طور پر استعمال نہ ہونے دے۔
ترجمان دفتر خارجہ شفقت علی خان نے اپنی ہفتہ وار بریفنگ کے دوران کہا کہ پاکستان افغانستان کی خودمختاری کا احترام کرتا ہے اور دہشت گردی کے مشترکہ چیلنجز سے نمٹنے کیلئے اپنے ہمسایہ ملک کے ساتھ مذاکرات اور تعاون کے عزم پرثابت قدمی سے قائم ہے۔
انہوں نے کہا فتنتہ الخوارج جیسے گروپ ہمارے خطے کے امن و استحکام کیلئے مشترکہ چیلنج ہیں اور ان کے خطرناک اثرورسوخ کے خاتمے کیلئے اجتماعی کوششوں کی ضرورت ہے۔ پاکستان اس بات پر یقین رکھتا ہے کہ دہشت گردی سے نمٹنے اور امن و استحکام کی بحالی میں دونوں ملکوں کا مفاد ہے۔
انہوں نے کہا افغانستان میں دہشت گردوں کے ٹھکانے ایک سنگین مسئلہ ہے اور افغانستان کو یہ مسئلہ حل کرنا چاہیے۔
