زمبابوے میں بس اور مال گاڑی میں خوفناک تصادم، 9 افراد جاں بحق، 25 زخمی

اسلام آباد(پاکستانی نیوزڈیسک)

افریقی ملک Zimbabwe میں مال گاڑی اور مسافر بس کے درمیان خوفناک تصادم کے نتیجے میں 9 افراد ہلاک جبکہ 25 زخمی ہو گئے۔

غیر ملکی میڈیا رپورٹس کے مطابق یہ حادثہ دارالحکومت Harare سے تقریباً 13 کلومیٹر جنوب مغرب میں ایک ریلوے کراسنگ پر پیش آیا۔ زمبابوے کے سرکاری ریلوے کے ترجمان Andrew Kunambura نے بتایا کہ بس ڈرائیور ریلوے کراسنگ عبور کرتے وقت بروقت بریک لگانے میں ناکام رہا، جس کے باعث بس مال گاڑی سے ٹکرا گئی۔

حکام کے مطابق جاں بحق ہونے والوں میں 2 بچے بھی شامل ہیں، جبکہ زخمی ہونے والے 25 افراد کو فوری طور پر قریبی اسپتالوں میں منتقل کر دیا گیا جہاں بعض کی حالت تشویشناک بتائی جا رہی ہے۔

بین الاقوامی میڈیا کے مطابق زمبابوے میں سڑک حادثات ایک سنگین مسئلہ بن چکے ہیں۔ ملک میں اوسطاً ہر 15 منٹ بعد ایک ٹریفک حادثہ پیش آتا ہے، جبکہ روزانہ اوسطاً 5 افراد جان کی بازی ہار جاتے ہیں اور 38 افراد زخمی ہوتے ہیں۔

حکام کا کہنا ہے کہ ملک میں ہونے والے تقریباً 94 فیصد ٹریفک حادثات انسانی غلطی اور لاپروائی کے باعث پیش آتے ہیں، جس کے باعث سڑکوں اور ریلوے کراسنگز پر حفاظتی اقدامات مزید سخت کرنے کی ضرورت پر زور دیا جا رہا ہے۔