الحدیدہ پر سعودی اتحادی افواج کے حملے، حوثیوں کا سخت جوابی کارروائی کا اعلان

اسلام آباد(پاکستانی نیوزڈیسک)

سعودی اتحادی افواج نے یمن کے الحدیدہ گورنریٹ میں حوثیوں سے منسلک فوجی ٹھکانوں پر فضائی کارروائی کا دعویٰ کرتے ہوئے کہا ہے کہ حملوں کا مقصد بحیرہ احمر میں تجارتی جہاز رانی کو درپیش خطرات کا خاتمہ تھا۔ اتحادی افواج کے مطابق الحدیدہ بندرگاہ کو نشانہ نہیں بنایا گیا اور تمام بندرگاہیں جہاز رانی کے لیے بدستور کھلی ہیں۔

دوسری جانب حوثیوں سے وابستہ ٹی وی چینل المسیرہ نے دعویٰ کیا کہ سعودی جنگی طیاروں نے الحدیدہ شہر اور کمران جزیرے پر فضائی حملے کیے، جبکہ یمنی سرکاری خبر رساں ایجنسی کے مطابق الحدیدہ میں ٹیلی کمیونیکیشن کارپوریشن کی تنصیبات بھی حملوں کی زد میں آئیں۔

حوثیوں کی وزارتِ خارجہ نے ٹیلی کمیونیکیشن تنصیبات پر حملے کو "سنگین غلطی” قرار دیتے ہوئے خبردار کیا کہ اس کا جواب "جیسے کو تیسا” دیا جائے گا۔ وزارتِ خارجہ کا کہنا تھا کہ یمن کا محاصرہ ختم کرنے کے مطالبے کو تسلیم کرنے کے بجائے سعودی حکومت نے ایسی کارروائی کی ہے جس کی اسے بھاری قیمت چکانا پڑے گی۔

ادھر سعودی اتحادی افواج نے واضح کیا ہے کہ اگر حوثیوں کی جارحانہ کارروائیاں جاری رہیں تو ان کا بھرپور جواب دیا جائے گا۔ یہ پیش رفت ایک روز بعد سامنے آئی ہے جب حوثی جماعت انصار اللہ نے دو سعودی آئل ٹینکروں کو نشانہ بنانے کا دعویٰ کیا تھا، مؤقف اختیار کرتے ہوئے کہ ان جہازوں نے ان کی اعلان کردہ بحری ناکہ بندی کی خلاف ورزی کی تھی۔