ایران ڈیل نہیں کرتا تو مجھے بڑا فیصلہ کرنا ہوگا ،، امریکہ دنیا میں پائیدار امن کے لئے کام کررہا ہے، امریکی صدر

نیویارک اقوام متحدہ ( ذیشان شمسی )اقوام متحدہ جنرل اسمبلی کے افتتاحی اجلاس سے خطاب کرتے ہوئے صدر ڈونلڈ ٹرمپ نے کہا کہ ہم سب یہاں امن کی بات کرنے کیلئے جمع ہوئے ہیں، امریکی معیشت پہلے سے مضبوط ہوئی ہے، امریکا اور امریکی شہریوں کا مستقبل روشن ہے۔ امریکی صدر نے کہا کہ امریکی سرحدیں محفوظ ہوگئی ہیں، امریکی معیشت اور سرحدیں بھی پہلے سے مضبوط ہوئی ہیں، امریکی فوج دنیا کی طاقتور ترین فوج ہے۔ ٹرمپ نے کہا کہ پہلے غیر قانونی تارکین وطن امریکا آتے تھے، اب ان کی تعداد صفر ہے، امریکا کا مستقبل روشن ہے۔

ایران سے متعلق امریکی صدر نے کہا کہ ایرانی مشرق وسطیٰ میں غنڈہ گردی کر رہا تھا، اب نہیں کرسکتا، ایران ہر گز ایٹمی ہتھیار نہیں رکھ سکتا۔ڈونلڈ ٹرمپ نے کہا کہ آپریشن مڈ نائٹ ہیمر میں ایران کے ٹھکانوں کو نشانہ بنایا، ملٹری آپریشن کے ذریعے ایران کو جوہری ہتھیار حاصل کرنے سے روکا۔

امریکی صدر نے دعویٰ کیا کہ ایران کی معیشت تباہ ہوچکی، مہنگائی 300 فیصد تک پہنچ گئی، ایران دنیا میں دہشتگردی کا سہولت کار ہے۔ٹرمپ نے کہا کہ ہم دنیا کو محفوظ ترین بنانے کیلئے کام کررہے ہیں، میں نے امن قائم کیا اور خطرات کا مقابلہ کیا، ایرانی حکومت نے کئی دہائیوں سے زندگی اجیرن کررکھی تھی۔

امریکی صدر نے کہا کہ میں بڑے فیصلے کا اعلان کرنے جارہا ہوں، مجھے فیصلہ کرنا ہے کہ ایران کو تباہ کروں یا انہیں دوبارہ پنپنے کا موقع دوں۔

ٹرمپ نے کہا کہ یقین ہے وسط مدتی انتخابات کے فورا بعد ایران سے معاہدہ ہوجائے گا، ایرانی دیکھنا چاہتے ہیں کہ مڈ ٹرم الیکشن میں میری پوزیشن کیا رہتی ہے۔

اقوام متحدہ جنرل اسمبلی کے افتتاحی اجلاس سے خطاب کرتے ہوئے امریکی صدر ڈونلڈ ٹرمپ نے کہا کہ میں نے 8 جنگیں رکوائیں۔

امریکی صدر نے اپنے خطاب میں ایک بار پھر پاک بھارت جنگ کا تذکرہ بھی کیا اور پاکستانی وزیر اعظم کی تعریف کی۔

ٹرمپ کا کہنا تھا کہ وزیر اعظم شہباز شریف نے کہا میں نے کروڑوں لوگوں کی زندگیاں بچائیں۔امریکی صدر نے وزیر اعظم شہباز شریف کو عظیم لیڈر قرار دے دیا اور کہا کہ پاکستان کے وزیر اعظم شہباز شریف بہترین شخص ہیں