امریکا کا ایران کو انتباہ: ڈیل نہ ہوئی تو فوجی کارروائی کے لیے تیار ہیں

اسلام آباد(پاکستانی نیوزڈیسک)امریکی وزیر جنگ
Pete Hegseth نے ایران کو سخت انتباہ دیتے ہوئے کہا ہے کہ اگر معاہدہ نہ ہوا تو امریکی افواج دوبارہ جنگی کارروائی کے لیے تیار ہیں۔ پینٹاگون میں پریس کانفرنس کے دوران انہوں نے کہا کہ امریکا ایران کی سرگرمیوں پر گہری نظر رکھے ہوئے ہے اور دونوں ممالک کی فوجی صلاحیتوں کا کوئی موازنہ نہیں۔

انہوں نے مزید کہا کہ ایران کو معلوم ہونا چاہیے کہ امریکا آج بھی پہلے کی طرح طاقتور ہے، اور وہ ایران کی جانب سے فوجی اثاثوں کی منتقلی سے بھی آگاہ ہے۔ ان کا کہنا تھا کہ ایران کو اپنے فیصلے دانشمندی سے کرنے ہوں گے کیونکہ اسے کسی صورت جوہری ہتھیار رکھنے کی اجازت نہیں دی جا سکتی۔

پیٹ ہیگسیتھ نے آبنائے ہرمز کے حوالے سے ایران کے دعوؤں کو مسترد کرتے ہوئے کہا کہ تجارتی جہازوں کو نشانہ بنانے کی دھمکیاں دینا کنٹرول نہیں بلکہ بحری قزاقی ہے۔ انہوں نے واضح کیا کہ اگر معاہدہ نہ ہوا تو امریکی افواج ہر قسم کی کارروائی کے لیے تیار ہیں۔