ٹیسٹ کرکٹ میں شائقین کی کم حاضری، کیون پیٹرسن نے مفت داخلے کی تجویز دے دی

اسلام آباد(پاکستانی نیوزڈیسک)

انگلینڈ کے سابق کپتان کیون پیٹرسن نے ٹیسٹ کرکٹ کے دوران اسٹیڈیمز میں تماشائیوں کی کم ہوتی تعداد پر تشویش کا اظہار کرتے ہوئے کم حاضری والے میدانوں میں شائقین کو مفت داخلے کی سہولت دینے کی تجویز پیش کر دی۔

کیون پیٹرسن نے سوشل میڈیا پلیٹ فارم ایکس پر اپنی پوسٹ میں کہا کہ کرکٹ بورڈز کو ٹی 20 فرنچائز ٹورنامنٹس سے آمدنی حاصل کرنی چاہیے اور اس رقم کو استعمال کرتے ہوئے ان مقامات پر ٹیسٹ کرکٹ کے لیے مفت داخلے کی سہولت فراہم کرنی چاہیے جہاں شائقین کی تعداد کم ہے۔

ان کا کہنا تھا کہ ڈربن اور پورٹ الزبتھ میں ٹکٹوں کی فروخت سے حاصل ہونے والی آمدنی اتنی نہیں تھی کہ اسٹیڈیمز میں تماشائیوں کی غیر موجودگی کا جواز پیش کیا جا سکے۔

کیون پیٹرسن کا یہ بیان جنوبی افریقا اور آسٹریلیا کے درمیان جاری ٹیسٹ سیریز کے دوران اسٹیڈیمز میں شائقین کی کم تعداد پر سابق آسٹریلوی اوپنر ڈیوڈ وارنر کی تنقید کے بعد سامنے آیا ہے۔ ڈیوڈ وارنر نے خالی اسٹیڈیمز پر تشویش ظاہر کرتے ہوئے سوال اٹھایا تھا کہ اگر شائقین میدانوں کا رخ نہیں کر رہے تو ٹیسٹ کرکٹ کو کھیل کا اعلیٰ ترین فارمیٹ قرار دینے کا کیا جواز ہے۔

سیریز کے پہلے ٹیسٹ میں ڈربن کے کنگزمیڈ اسٹیڈیم میں پانچ روز کے دوران 20 ہزار سے بھی کم شائقین پہنچے، جو اسٹیڈیم کی مجموعی گنجائش کے پانچویں حصے سے بھی کم تھے۔ دوسرے ٹیسٹ میں بھی پورٹ الزبتھ کے سینٹ جارجز پارک میں بڑی تعداد میں نشستیں خالی رہیں۔

جنوبی افریقا میں شائقین کی کم حاضری نے ٹیسٹ کرکٹ کی مقبولیت بڑھانے اور اسے مزید قابلِ رسائی بنانے کے حوالے سے نئی بحث چھیڑ دی ہے، جبکہ متعلقہ کرکٹ حکام نے بھی کم حاضری کی وجوہات جاننے کے لیے اندرونی جائزے کا اعلان کیا ہے۔