نئی تحقیق: کافی کے اجزاء عمر رسیدگی اور تناؤ سے متعلق پروٹین پر اثر انداز ہو سکتے ہیں

اسلام آباد(پاکستانی نیوزڈیسک)ایک نئی سائنسی تحقیق میں انکشاف ہوا ہے کہ کافی میں موجود بعض قدرتی کمپاؤنڈز انسانی جسم میں ایسے ریسیپٹر پروٹین پر اثر انداز ہو سکتے ہیں جو تناؤ، عمر رسیدگی اور مختلف بیماریوں کے عمل میں کردار ادا کرتے ہیں۔

دہائیوں پر محیط مطالعات سے یہ بات سامنے آتی رہی ہے کہ کافی پینے والے افراد نسبتاً زیادہ طویل عمر پاتے ہیں اور ان میں مختلف دائمی بیماریوں کا خطرہ کم ہوتا ہے۔ ان بیماریوں میں میٹابولک ڈس آرڈرز، بعض اقسام کے کینسر، پارکنسنز بیماری، ڈیمینشیا اور دل کی بیماریاں شامل ہیں۔

تحقیق کے مطابق کافی میں موجود پولیفینولز اور فلیونوائڈز جیسے کیمیکلز میں اینٹی آکسیڈنٹ اور اینٹی انفلیمیٹری خصوصیات پائی جاتی ہیں، جو جسم کے خلیوں کو نقصان اور عمر رسیدگی کے اثرات سے محفوظ رکھنے میں مددگار ہو سکتی ہیں۔

تاہم اب تک یہ واضح نہیں تھا کہ یہ مرکبات جسم میں کس میکانزم کے تحت اثر انداز ہوتے ہیں۔ نئی تحقیق میں اشارہ دیا گیا ہے کہ کافی ممکنہ طور پر NR4A1 نامی ریسیپٹر پروٹین پر اثر ڈال کر اپنے فوائد پیدا کرتی ہے، جو عمر رسیدگی، اسٹریس اور دل کی بیماریوں سے منسلک سمجھا جاتا ہے۔

ماہرین کے مطابق یہ نتائج کافی اور انسانی صحت کے درمیان تعلق کو سمجھنے میں ایک اہم پیش رفت ہو سکتے ہیں، تاہم اس حوالے سے مزید تحقیق کی ضرورت بھی برقرار ہے۔