ایران مذاکرات: ٹرمپ کا پاکستان میں اگلے دور کا عندیہ

امریکی صدر ڈونلڈ ٹرمپ نے کہا ہے کہ ایران کے ساتھ مذاکرات کا اگلا دور آئندہ دو دن میں پاکستان میں ہونے کا امکان ہے، اور اس مقصد کے لیے اسلام آباد جانے پر سنجیدگی سے غور کیا جا رہا ہے۔

امریکی اخبار New York Post کو دیے گئے انٹرویو میں ڈونلڈ ٹرمپ نے کہا کہ وہ کسی ایسے ملک میں مذاکرات نہیں کرنا چاہتے جس کا اس معاملے سے براہِ راست تعلق نہ ہو۔ انہوں نے پاکستان کی عسکری قیادت، خصوصاً عاصم منیر کی کارکردگی کو سراہتے ہوئے کہا کہ “فیلڈ مارشل بہت اچھا کام کر رہے ہیں”، اسی لیے پاکستان ایک مضبوط آپشن کے طور پر سامنے آ رہا ہے۔

انہوں نے مزید کہا کہ اس تناظر میں دوبارہ اسلام آباد کا دورہ بھی متوقع ہو سکتا ہے، جو خطے میں اہم سفارتی پیش رفت ثابت ہو سکتی ہے۔

دوسری جانب ڈونلڈ ٹرمپ نے سوشل میڈیا پر یورپ کی توانائی پالیسیوں پر بھی تنقید کی۔ ان کا کہنا تھا کہ یورپ اس وقت توانائی بحران کا شکار ہے جبکہ برطانیہ شمالی سمندر سے تیل نکالنے سے گریز کر رہا ہے، جسے انہوں نے “غلط فیصلہ” قرار دیا۔

انہوں نے کہا کہ شمالی سمندر دنیا کے بہترین تیل کے ذخائر میں سے ایک ہے، جبکہ ناروے اپنا تیل برطانیہ کو مہنگے داموں فروخت کر رہا ہے۔