ایران جنگ 2027 تک جاری رہی تو عالمی معیشت مزید دباؤ کا شکار ہو سکتی ہے: آئی ایم ایف

اسلام آباد(پاکستانی نیوزڈیسک)بین الاقوامی مالیاتی فنڈ (آئی ایم ایف) نے خبردار کیا ہے کہ اگر خطے میں جاری کشیدگی، بالخصوص ایران سے متعلق صورتحال 2027 تک جاری رہتی ہے اور تیل کی قیمتیں 125 ڈالر فی بیرل تک برقرار رہتی ہیں تو عالمی معیشت کو سنگین چیلنجز کا سامنا ہو سکتا ہے۔

آئی ایم ایف کی منیجنگ ڈائریکٹر کرسٹالینا جارجیوا نے ایک بیان میں کہا کہ ادارے کی پہلے کی گئی اقتصادی پیش گوئیاں موجودہ جغرافیائی سیاسی صورتحال کے تناظر میں مکمل طور پر درست نہیں رہیں۔

انہوں نے بتایا کہ پہلے اندازہ تھا کہ ایران سے متعلق کشیدگی اور ممکنہ ایران-امریکا-اسرائیل تناؤ صرف عالمی اقتصادی ترقی میں سست روی اور مہنگائی میں معمولی اضافے کا سبب بنے گا، تاہم اب خطرات زیادہ سنگین نظر آ رہے ہیں۔

آئی ایم ایف کے مطابق اگر توانائی کی قیمتیں بلند رہیں اور خطے میں طویل جنگی صورتحال برقرار رہی تو عالمی سطح پر مہنگائی میں اضافہ، ترقی کی رفتار میں کمی اور مالیاتی دباؤ میں مزید اضافہ ہو سکتا ہے۔