تیل کی قیمتوں میں معمولی کمی، آبنائے ہرمز کشیدگی کے باعث مارکیٹ دباؤ کا شکار

اسلام آباد(پاکستانی نیوزڈیسک)عالمی منڈی میں تیل کی قیمتوں میں معمولی کمی ریکارڈ کی گئی ہے، تاہم قیمتیں اب بھی 100 ڈالر فی بیرل سے اوپر برقرار ہیں۔ توانائی ماہرین کے مطابق آبنائے ہرمز میں جاری کشیدگی اور بحری نقل و حمل میں خلل کے باعث مارکیٹ بدستور دباؤ کا شکار ہے۔

رپورٹس کے مطابق برینٹ کروڈ فیوچرز کی قیمت میں ایک فیصد سے زائد کمی کے بعد یہ تقریباً 112 ڈالر فی بیرل پر آ گئی، جبکہ امریکی خام تیل بھی کم ہو کر 104 ڈالر فی بیرل سے نیچے آگیا۔

تجزیہ کاروں کا کہنا ہے کہ قیمتوں میں حالیہ کمی عارضی ہو سکتی ہے کیونکہ خطے میں غیر یقینی صورتحال برقرار ہے، خاص طور پر امریکا اور ایران کے درمیان کشیدگی عالمی سپلائی کو متاثر کر رہی ہے۔ ماہرین کے مطابق آبنائے ہرمز میں کسی بھی قسم کی رکاوٹ عالمی معیشت پر فوری اثر ڈالتی ہے، اسی لیے قیمتیں کم ہونے کے باوجود بلند سطح پر موجود ہیں۔