ایران ورلڈ کپ 2026 امریکا میں ہی کھیلے گا، فیفا صدر کا دوٹوک اعلان

اسلام آباد(پاکستانی نیوزڈیسک)فیفا کے صدر جیانی انفانٹینو نے اعلان کیا ہے کہ سیاسی و سفارتی پیچیدگیوں کے باوجود ایران آئندہ فیفا ورلڈ کپ 2026 میں شرکت کرے گا اور اپنے میچز امریکا میں ہی کھیلے گا۔

وینکوور میں ہونے والے فیفا کانگریس کے دوران انفانٹینو کا کہنا تھا کہ فٹبال کا بنیادی مقصد دنیا کو جوڑنا ہے اور اسی اصول کے تحت یہ فیصلہ برقرار رکھا گیا ہے۔

واضح رہے کہ 2026 کا ورلڈ کپ امریکا، کینیڈا اور میکسیکو کی مشترکہ میزبانی میں منعقد ہوگا۔ ایران کی شرکت اس وقت زیر بحث آئی تھی جب امریکا اور ایران کے درمیان کشیدگی میں اضافہ ہوا اور ایران نے اپنے میچز کسی دوسرے ملک منتقل کرنے کی درخواست کی تھی، جسے فیفا نے مسترد کر دیا۔

امریکی حکام کی جانب سے اشارہ دیا گیا ہے کہ ایرانی کھلاڑیوں کو شرکت کی اجازت ہوگی، تاہم سیکیورٹی اور ویزا سے متعلق کچھ پابندیاں برقرار رہیں گی، خاص طور پر ان افراد کے لیے جن کے بعض اداروں سے تعلقات ہوں۔

دوسری جانب ایران کی فیفا کانگریس میں عدم شرکت نے معاملے کی حساسیت کو مزید بڑھا دیا ہے، جبکہ عالمی سطح پر کھیل اور سیاست کو الگ رکھنے پر بحث جاری ہے۔

یاد رہے کہ ایران پہلے ہی ورلڈ کپ 2026 کے لیے کوالیفائی کر چکا ہے اور یہ اس کی تاریخ میں ساتویں شرکت ہوگی، تاہم فیفا صدر کے بیان کے بعد تاحال ایرانی حکام کی جانب سے کوئی باضابطہ ردعمل سامنے نہیں آیا۔