ٹرمپ کا ایران سے مذاکرات جاری رکھنے اور تعاون بڑھانے کا عندیہ

امریکا کے صدر Donald Trump نے اپنی حالیہ سوشل میڈیا پوسٹ میں ایران کے ساتھ مذاکرات جاری رکھنے اور بھرپور تعاون کرنے کا عندیہ دیا ہے۔

سوشل میڈیا پلیٹ فارم Truth Social پر جاری بیان میں صدر ٹرمپ نے کہا کہ امریکا ایران کے ساتھ مل کر کام کرے گا کیونکہ وہاں مفید رجیم چینج ہو چکی ہے۔

انہوں نے مزید کہا کہ ایران میں یورینیم کی افزودگی نہیں ہوگی اور امریکا، ایران کے ساتھ مل کر زمین کی گہرائی میں دفن ایٹمی مواد کو نکال کر ہٹا دے گا۔ صدر ٹرمپ کے مطابق یہ مواد سخت سیٹلائٹ نگرانی میں رہا ہے، جس میں United States Space Force بھی شامل ہے، اور حملے کے دن سے اب تک کسی چیز کو نہیں چھیڑا گیا۔

صدر ٹرمپ نے یہ بھی عندیہ دیا کہ امریکا ایران کے ساتھ ٹیرف اور پابندیوں میں نرمی پر بات کرے گا، جبکہ 15 نکات میں سے کئی پر پہلے ہی اتفاق ہو چکا ہے۔

یاد رہے کہ اس کشیدگی کا آغاز 28 فروری کو امریکا اور اسرائیل کی جانب سے کیے گئے حملے سے ہوا تھا، جس میں ایران کی اہم شخصیات بشمول Ali Khamenei کو نشانہ بنایا گیا۔

اس کے ردعمل میں ایران نے خلیجی ممالک میں امریکی فوجی اڈوں اور تنصیبات کو نشانہ بنایا اور آبنائے ہرمز کو بند کر دیا، جس کے باعث عالمی سطح پر تیل کی قلت اور قیمتوں میں شدید اضافہ دیکھنے میں آیا۔

بعد ازاں صدر ٹرمپ کی ڈیڈ لائن ختم ہونے پر امریکا اور ایران کے درمیان دو ہفتوں کی جنگ بندی پر اتفاق ہوا، جس کے دوران امریکا حملے بند کرے گا جبکہ ایران آبنائے ہرمز کو کھول دے گا۔

حکام کے مطابق اس عرصے میں دونوں ممالک کے درمیان مذاکرات کے ذریعے مستقل حل تلاش کرنے کی کوشش کی جائے گی۔