اسلام آباد میں ایران مذاکرات کا دوسرا راؤنڈ، امریکی وفد کی قیادت کون کرے گا؟ بڑی خبر سامنے آگئی

واشنگٹن سے موصولہ اطلاعات کے مطابق امریکی میڈیا، خصوصاً CNN نے امکان ظاہر کیا ہے کہ اگر ایران کے ساتھ جنگ بندی سے قبل مزید مذاکرات طے پاتے ہیں تو امریکی وفد کی قیادت نائب صدر جے ڈی وینس کے سپرد کی جا سکتی ہے۔

رپورٹس کے مطابق اس ممکنہ وفد میں سابق امریکی صدر کے داماد جیرڈ کشنر اور مشرق وسطیٰ کے لیے خصوصی مندوب اسٹیو وٹکوف بھی شامل ہو سکتے ہیں، جو مذاکراتی عمل میں اہم کردار ادا کریں گے۔

اس سے قبل امریکی صدر ڈونلڈ ٹرمپ بھی اشارہ دے چکے ہیں کہ ایران کے ساتھ مذاکرات کا نیا دور آئندہ دو روز میں دوبارہ شروع ہو سکتا ہے۔

ذرائع کے مطابق مذاکرات میں سب سے حساس اور پیچیدہ معاملہ ایران کا یورینیم افزودگی پروگرام ہے، جس پر دونوں فریقین کے درمیان مدت اور حدود کے حوالے سے اختلافات برقرار ہیں۔

امریکا کا مؤقف ہے کہ ایران کو اپنی جوہری تنصیبات مکمل طور پر ختم کرنی چاہئیں، جبکہ ساتھ ہی آبنائے ہرمز کو کھولنے کا مطالبہ بھی کیا جا رہا ہے تاکہ عالمی بحری تجارت بحال رہ سکے۔

تجزیہ کاروں کے مطابق یہ مذاکرات نہ صرف خطے میں کشیدگی کم کرنے بلکہ عالمی معیشت پر پڑنے والے اثرات کو کم کرنے میں بھی اہم کردار ادا کر سکتے ہیں۔