ذیابیطس کنٹرول کرنے میں ورزش کلیدی کردار ادا کرتی ہے، ماہرین

اسلام آباد(پاکستانی نیوزڈیسک)ورلڈ ہیلتھ آرگنائزیشن کے مطابق دنیا بھر میں تقریباً 800 ملین افراد ذیابیطس کا شکار ہیں، اور اس مرض میں بلڈ شوگر کو کنٹرول میں رکھنا مجموعی صحت کے لیے نہایت ضروری ہے۔

ماہرین کا کہنا ہے کہ اگرچہ متوازن غذا اور ادویات اہم کردار ادا کرتی ہیں، تاہم ورزش کو بھی نظر انداز نہیں کیا جا سکتا۔ خاص طور پر ٹائپ ٹو ذیابیطس کے مریضوں کے لیے جسمانی سرگرمی کسی “جادوئی حل” سے کم نہیں، کیونکہ یہ انسولین کی حساسیت کو بہتر بناتی ہے۔

ماہرین کے مطابق بلڈ شوگر کو مؤثر انداز میں کنٹرول کرنے کے لیے دو طرح کی ورزشوں کو معمول بنانا چاہیے:

ایروبک ورزش جیسے تیز چہل قدمی، جاگنگ، تیراکی، سائیکلنگ اور رقص دل اور پھیپھڑوں کی صحت بہتر بناتے ہیں اور بلڈ شوگر کی سطح کو تیزی سے کم کرنے میں مدد دیتے ہیں۔ ابتدا میں روزانہ 10 سے 15 منٹ سے آغاز کر کے اسے بتدریج 30 سے 40 منٹ تک، ہفتے میں پانچ دن تک بڑھایا جا سکتا ہے۔

دوسری جانب مزاحمتی یا طاقت بڑھانے والی ورزشیں جیسے ویٹ لفٹنگ، مزاحمتی بینڈ یا پش اپس عضلات کو مضبوط کرتی ہیں، جس سے انسولین بہتر طریقے سے کام کرتی ہے۔ ماہرین ہفتے میں کم از کم دو سے تین دن اس قسم کی ورزش کی تجویز دیتے ہیں۔

ماہرین کا مزید کہنا ہے کہ روزانہ 20 سے 30 منٹ کی باقاعدہ ورزش بہترین نتائج دیتی ہے، تاہم نئے افراد آہستہ آغاز کریں۔ بہت زیادہ یا سخت ورزش کے بجائے مستقل مزاجی کو ترجیح دینا زیادہ مؤثر ثابت ہوتا ہے۔